ജേണലിസം ക്ലാസുകളിൽ പറയുന്നതുപോലെ, പട്ടി മനുഷ്യനെ കടിച്ചാൽ അത് വാർത്തയല്ല; മറിച്ച് മനുഷ്യൻ പട്ടിയെ കടിച്ചാൽ മാത്രമാണ് വാർത്തയാകുന്നത്. ഇപ്പോഴത്തെ മാധ്യമ ചർച്ചകളിലും അതേ സ്വഭാവമാണ് കാണുന്നത്.
കൈരളി ടീവിയിൽ അവതാരികയായിരുന്ന അസിത സഹീർ സിപിഎം അനുഭാവികളുടെ ഇഷ്ട താരമായിരുന്നു. അവിടെ നിന്ന് 24 ന്യൂസിലേക്ക് മാറുമ്പോൾ, “എവിടെ പോയാലും നിലപാടുകളിൽ വിട്ടുവീഴ്ച ചെയ്യാതെ മുന്നോട്ട് പോകുക” എന്ന ഉപദേശമാണ് കൂടുതലായി ലഭിച്ചത്. ട്വന്റിഫോറിൽ എത്തിച്ചേരുന്ന അസിതയ്ക്ക് ചാനൽ നല്ലൊരു പ്ലാറ്റ്ഫോം നൽകി. അത് കൃത്യമായി ഉപയോഗിച്ച അവൾ ചുരുങ്ങിയ സമയത്തിനുള്ളിൽ പ്രേക്ഷക ശ്രദ്ധ പിടിച്ചുപറ്റി. ഇടത് സൈബർ ഗ്രൂപ്പുകളുടെ ശക്തമായ പിന്തുണ കൂടി ലഭിച്ചതോടെ, അവളുടെ സ്വാധീനം ഇരട്ടിയായി.
ഇതിനിടെ കേരളം തിരഞ്ഞെടുപ്പ് ചൂടിലേക്ക് കടന്നതോടെ, ശ്രീകണ്ഠൻ നായർ നയിക്കുന്ന ‘ദി ഗ്രാൻഡ് ഇലക്ഷൻ ഡിബേറ്റ്’ ആരംഭിച്ചു. ഒരു ചർച്ച ആകർഷകമാകാൻ അതിൽ പങ്കെടുക്കുന്നവർക്ക് വ്യക്തമായ നിലപാടുകൾ വേണം. എന്നാൽ, ഹാഷ്മി താജ് ഇബ്രാഹിംക്ക് നൽകിയിരിക്കുന്ന സ്ഥാനം പലപ്പോഴും ഇടതുപക്ഷത്തെ വിമർശിക്കുന്നതിലേക്കോ, മറുവശത്ത് നിൽക്കുന്നതിലേക്കോ ചുരുങ്ങുന്നതാണ്.
ഇവിടെയാണ് ചാനൽ തന്ത്രം വ്യക്തമായുന്നത്. പരിചയസമ്പന്നനായ ഹാഷ്മിയോട് താരതമ്യപ്പെടുത്തുമ്പോൾ, ജൂനിയറായ അസിത അദ്ദേഹത്തെ ചർച്ചയിൽ മറികടക്കുകയാണെങ്കിൽ അത് സ്വാഭാവികമായി വൈറലാകും. പ്രേക്ഷകർക്ക് കാണാനും, ചർച്ച ചെയ്യാനും, ആഘോഷിക്കാനും ഉള്ള ഒരു വിഷയം അതുവഴി സൃഷ്ടിക്കപ്പെടുന്നു.
സോഷ്യൽ മീഡിയയിൽ ഹാഷ്മിക്ക് പലവിധ വിശേഷണങ്ങളാണ് ലഭിക്കുന്നത്—കമ്യൂണിസ്റ്റുകാർക്ക് ഇടത് വിരുദ്ധൻ, സംഘപരിവാർക്കാർക്ക് ‘സുടാപ്പി’, കോൺഗ്രസുകാർക്ക് മുൻ എസ്എഫ്ഐ നേതാവ്. ഇത്തരത്തിലുള്ള ഒരു വ്യക്തിയെ വിമർശിക്കാൻ ലഭിക്കുന്ന അവസരം ആരും പാഴാക്കുന്നില്ല.
ചർച്ചകൾക്ക് മുൻപ് അവതരിപ്പിക്കുന്ന ഇൻട്രോകളിലൂടെ ശ്രദ്ധ പിടിച്ചുപറ്റിയ ഒരു മാധ്യമപ്രവർത്തകനെ പരിഹസിക്കാനും വിമർശിക്കാനും എതിരാളികൾ ആസ്വദിക്കുന്ന കാഴ്ചയാണ് ഇപ്പോൾ കൂടുതലായി കാണുന്നത്. എന്നിരുന്നാലും, ലക്ഷക്കണക്കിന് മലയാളി പ്രേക്ഷകരുടെ മനസ്സിൽ ഹാഷ്മിക്ക് ഒരു സ്ഥാനം ഉണ്ട്—അത് ഒരു ചർച്ച കൊണ്ട് ഇല്ലാതാകില്ല.
പ്രിയപ്പെട്ട ഹാഷ്മി, നിങ്ങൾ സമൂഹത്തിന്റെ ശബ്ദമില്ലാത്തവർക്കായി ശബ്ദമാകണം. ജനങ്ങൾ പറയാൻ ആഗ്രഹിക്കുന്ന കാര്യങ്ങൾ ധൈര്യത്തോടെ ഉയർത്തിപ്പറയണം. അധികാരത്തിന്റെ ദാർഷ്ട്യത്തെ ചോദ്യം ചെയ്യാനും വിമർശിക്കാനും നിങ്ങളെ പോലുള്ളവരെ ഈ നാടിന് ഇപ്പോഴും ആവശ്യമുണ്ട്.
